Универзитетот „Гоце Делчев“ во Штип денеска беше центар на голема истражувачка мисија во рамки на Европската алијанса на девет универзитети. Настанот ги обедини професорите од сите институции членки, кои заеднички работат на креирање нови едукативни модели што треба да станат дел од редовната академска понуда.
Професорката Никодиновска Крстевска објасни дека мотивацијата за ова собирање произлегува од бројните предизвици со кои се соочува високото образование. „Ова е тема што е актуелна за сите нас и чувствувавме потреба да ја отвориме и продискутираме,“ истакна таа.
Главниот фокус на мисијата беше концептот за безбедно и инклузивно општество, разгледан од различни перспективи – од лична и дигитална безбедност, до создавање услови за заедница која ги прифаќа сите граѓани. Целта е преку заеднички активности постепено да се гради основа за интегрирани додипломски студии што би важеле за студентите од целата алијанса.
Професорот Мираковски додаде дека процесот почнува со пократки форми на едукација. „Започнуваме со обуки и летни школи, а конечната амбиција е да развиеме заеднички додипломски програми,“ рече тој.
Меѓу гостите беа и универзитетски наставници од други европски држави, кои дадоа свој придонес во развојот на проектот. Професорката Кетрин најави дека ќе се посвети на темата дигитална безбедност. „Ова прашање станува сè поважно, особено во денешниот глобален контекст,“ нагласи таа. Професорот Едуардо не ја криеше радоста од учеството: „Навистина ми е чест што сум дел од оваа иницијатива заедно со колегите од целата алијанса.“
Настанот има значење и за локалната заедница, истакна градоначалникот Иван Јорданов. Според него, проектот ќе ја зајакне институционалната соработка и ќе донесе современи практики во градот. „Ваквите иницијативи отвораат пат кон поинклузивни и модерни општествени политики,“ изјави Јорданов.
УГД Штип, како член на Европската Алијанса на универзитети, заедно со уште осум партнерски институции, работи на уедначување на квалитетот на студиските програми. Со тоа, студентите ќе имаат пристап до образование што носи европски призната диплома.
