Градоначалникот Костадин Костадинов ја претставува Струмица на петтиот Глобален самит на Силни градови што од 3 до 5 декември, се одржува во Кејптаун, Африка.
Костадинов ќе им се придружи на градоначалниците, локалните лидери и меѓународните партнери на овој важен настан, организиран од Мрежата на силни градови и градот Кејптаун, а спонзориран од Министерството за надворешни работи на Данска, Европската Унија и Стејт департментот на САД, ќе се фокусира на решавање на критичните предизвици во градовите ширум светот.
Учеството на градоначалникот Костадинов ја позиционира Струмица на лидерската маса каде се поттикнуваат и развиваат инклузивни заедници и справување со глобалните проблеми кои влијаат на локалното владеење.
„Огромно е признанието за општина Струмица и работата на Локалниот Совет за Превенција кои се препознаени на светско ниво. Како активни учесници на петтиот Глобален Самит на Силни Градови, земаме рамноправно учество со останатите глобалните лидери, со цел – заеднички да ги адресираме клучните теми кои имаат предзнак ургентност – омраза, екстремизам и поларизација. Работиме да обезбедиме ниту една заедница да не стои сама во борбата за еднаквост, вклученост и безбедност. Учеството на самитот претставува дополнителна можност за размена на искуства и давање придонес за колективните решенија кои ги зајакнуваат градовите ширум светот, нагласувајќи ја виталната улога на локалното управување во обликувањето на безбедни и кохезивни општества. Со вклучување во овие дијалози, Струмица ги унапредува своите капацитети за имплементација на иновативни пристапи и градење партнерства, од кои директна корист имаат нашите граѓани.“ – изјави градоначалникот Костадинов.
Мрежата на Силни градови е првата глобална мрежа на градоначалници, креатори на политики и практичари кои работат на развој на отпорност на заедницата и справување со екстремизмот во сите негови форми. Годишниот Самит создава простор за градовите да соработуваат, да споделуваат сознанија и да ги зајакнат нивните капацитети за справување со критичните предизвици.
