Завршен од почеток до крај. Денес и официјално се пушти во употреба новата делница на булеварот Босна и Херцеговина во северниот дел на главниот град.

Станува збор за целосно нов булевар со вкупна должина од околу 1.700 метри, ширина од 40 метри, шест коловозни ленти, велосипедски и пешачки патеки, средишно и странично зеленило од двете страни и комплетно ново осветлување од булевар Словенија до булевар Христијан Тодоровски Карпош.

Новиот булевар Босна и Херцеговина заедно со булеварот Словенија ќе ги поврзува Карпош, Бутел, Шуто Оризари и Чаир, а заедно со новиот булевар Христијан Тодоровски Карпош за жителите на овој дел од градот ќе претставува побрз излез до скопската обиколница. Развојот на сообраќајната инфраструктура во северниот дел од градот во голема мера освен што ќе ја унапреди мобилноста на населението во овој дел од градот, ќе значи и создавање на услови за подобрување на работата на локалните бизниси кои функционираат на овој потег.

Градоначалникот Шилегов, на настанот на кој присуствуваа и вицепремиерот за економски прашања во владата на РСМ, Фатмир Битиќи, градоначалниците на Општина Чаир и Општина Бутел, Висар Ганиу и Велимир Смилевски, како и претседателката на Советот на Град Скопје, Љубица Јанчева, заедно со советници од Советот на Градот, изјави дека со вложувањето на средства се создаваат сериозни услови за развој на инфраструктурата, но и развој на северниот дел од градот.

– Денеска ги пуштаме во употреба последните 500 метри од новопроекрираниот булевар Босна и Херцеговина кој се спојува со булеварот Словенија. За реализацијата на овој капитален проект од Буџетот на Град Скопје се потрошени околу 100 милиони денари со пресметан ДДВ. Вложувањето на овие средства создаде услови за сериозен развој на инфраструктурата, но и сериозен развој на градот во северниот дел  и е дел од концептот за кој јас зборував со граѓаните во текот на  2017 година, секундарниот северен прстен, изјави Шилегов.

Тој додаде дека некогашната улица Босна и Херцеговина била изградена пред 40-тина години и оттогаш асфалтот не бил променет, а улицата била широка само седум метри.

– Сега имаме еден најсовремен по сите светски и европски стандарди булевар, широк  40 метри, со пешачки и велосипедски патеки по целата негова должина, коловозот е веќе спремен, пешачки и велосипедски патеки исто така, ни преостанува во следниот период да го уредиме и средишното булеварско зеленило. На овој булевар поставивме и ново лед осветлување. Новиот булевар за овој дел од градот ќе биде значителен инпут за  неговиот развој, особено ако се има предвид дека се спојува со булеварот Никола Карев кој е во завршна фаза, како и со клучката кај Момин поток којашто треба да почнеме да ја градиме во текот на јули, рече градоначалникот.

Градоначалникот Шилегов, исто така ја искористи приликата да им се заблагодари на жителите на општините Бутел, Чаир и Шуто Оризари за трпението за време на изградбата на булеварот и  нагласи дека чекор по чекор Скопје прераснува во град со развиена и одржлива урбана мобилност што подразбира безбеден и ефикасен сообраќај и почиста животна средина.