Градоначалникот на Град Скопје Петре Шилегов, вчеравечер присуствуваше на свеченото отворање на подновената спомен-соба на Крсте Мисирков во Институтот за македонски јазик во Скопје. Со оваа подновена и осовременета поставка, по речиси две децении од последното реновирање, се одбележува 95-годишнината од смртта на великанот Крсте Мисирков.
Старите документи од претходната поставка се зачувани во електронска форма и заедно со нови фотографии и документи, сведочат за целиот живот на Мисирков, почнувајќи од детството, преку училишните клупи и студиите до образовната, научната, дипломатската и револуционерната активност на првиот кодификатор на македонскиот јазик. Посебно место зазема книгата „За македонцките работи“, објавена во револуционерната 1903 година, пред цели 118 години.
Единствената спомен-соба посветена на животот и дејноста на Крсте Мисирков над четириесет години се наоѓа во Институтот за Македонски јазик „Крсте Мисирков“, а минатата година МОН финансиски ја поддржа иницијативата на Советот на Институтот за македонски јазик за реставрирање и подновување на Спомен-собата на Мисирков, на што се приклучи и Градот Скопје. Поставката е направена со стручна поддршка од Јасминка Намичева, кустос во Музеј на град Скопје.
До минатата година Спомен-собата на Мисирков ја имаат посетено повеќе илјади ученици од целата земја. За сите посетители (ученици, професори и научници од земјава и од странство) изложбата е бесплатна.
