Околу 560 жители на Штип досега ја примиле вакцината против сезонски грип, информираат од Центарот за јавно здравје. Интересот е голем, со просечно 60 имунизации дневно, а наскоро се очекува и нова пратка вакцини.
- Вакцинацијата започнала на 21 октомври, а досега се опфатени околу 560 лица.
- За 39 граѓани имунизацијата била извршена во домашни услови.
- Поради брзата потрошувачка на дозите, се очекуваат дополнителни количини.
Од Центарот за јавно здравје во Штип посочуваат дека граѓаните се вакцинираат со претходно утврден распоред, откако ќе добијат СМС-известување за терминот. Исклучок се лицата за кои вакцинацијата е организирана во нивните домови.
„Од почетокот на вакцинацијата на 21 октомври до денес, во Центарот за јавно здравје во Штип се вакцинирани приближно 560 граѓани против сезонски грип. Од нив, 39 лица се вакцинирани во домашни услови, додека останатите граѓани доаѓаат во точно закажан термин, за кој се известени преку СМС-порака. Во центарот на дневна основа се вршат околу 60 вакцинирања. Имунизацијата е сè уште во тек, а поради брзото трошење на дозите, наскоро се очекува да пристигнат и дополнителни количини вакцини“, велат од ЦЈЗ Штип.
Поделени ставови меѓу граѓаните за вакцинацијата
Мислењата на штипјани за вакцината против сезонски грип се различни. Дел од нив велат дека редовно се вакцинираат секоја година и немаат намера да ја прекинат таа практика, додека други сметаат дека вакцината не им носи доволна корист и затоа не планираат да ја примат.
И покрај различните ставови, лекарите ја нагласуваат важноста на имунизацијата, посочувајќи дека вакцината е најефикасната и најбезбедната мерка за заштита од сезонскиот грип, особено во периодот кога респираторните вируси полесно се шират.
Слушнете го Канал 77 радио во живо КЛИКНЕТЕ ТУКА
Извор: Центар за јавно здравје Штип
