Се зголемува интересот на штипјани за вакцинација против сезонскиот грип. Првичните две илјади бесплатни дози се веќе целосно искористени, а во Центарот за јавно здравје пристигнаа дополнителни 1.000 вакцини. Поради континуираниот интерес, Министерството за здравство испраќа нови количини за граѓаните кои сакаат навремено да се заштитат.
Пријавувањето за вакцинација преку платформата vakcinacija.mk сè уште е во тек, особено за лицата кои припаѓаат на ризичните категории.
„Од вкупно 3.000 пристигнати вакцини, досега се потрошени околу 2.400 дози“, изјави д-р Живкова од Центарот за јавно здравје – Штип.
Покрај бесплатните, од петок ќе започне и комерцијалната вакцинација против грип. За оваа намена се набавени 100 вакцини, наменети за граѓаните кои не припаѓаат на ризичните групи, а цената за една доза ќе изнесува 700 денари.
„Комерцијалните вакцини се очекува да пристигнат во петок, по што веднаш ќе започнеме со вакцинацијата“, додава Живкова.
Од Министерството за здравство информираат дека до овој момент за бесплатна вакцинација се пријавиле над 76.000 граѓани, а веќе се вакцинирани повеќе од 43.000 лица ширум државата.
„Нашите превентивни тимови продолжуваат со теренска вакцинација во домашни услови за повозрасни и неподвижни лица, како и за лицата со попреченост“, соопштуваат од Министерството.
Во меѓувреме, вакцинацијата со комерцијални дози веќе започна во Центарот за јавно здравје во Скопје, а во текот на неделата ќе се спроведува и во останатите градови низ земјата.
Во ризичните категории се вбројуваат граѓаните над 65 години, лицата со хронични заболувања, бремените жени, децата од шест месеци до пет години, здравствените работници, како и корисниците и вработените во домовите за стари лица и установите за социјална заштита.
