Денеска беше првиот академски час на Универзитетот „Гоце Делчев“ – Штип, каде што се собраа новите студенти од прва година на 12 факултети и три академии. Со свечените обраќања се означи почетокот на новата академска година, а атмосферата беше полна со очекувања и планови за иднината.
УГД е еден од најголемите универзитети во земјава, кој опфаќа 12 факултети (од општествени, природни, медицински и технички науки) и три академии во областа на уметноста.
Универзитетот нуди широк спектар студиски програми – од додипломски, преку магистерски, до докторски студии.
Во текот на денешниот настан, ректорот Дејан Мираковски го спомена напредокот во проектите за Факултетот за медицински науки и за нов Студентски дом во Штип. Иако изградбата допрва треба да почне, се работи на концепти, проекти и првични анализи.
„Универзитетот „Гоце Делчев“ не е директно одговорен за целокупната реализација на овие објекти, но ќе учествуваме активно преку соработка со проектантите. Има веќе првични контакти преку Министерството за образование“, рече Мираковски на новинарско прашање. Тој додаде дека Министерството за здравство го води проектот за Клиничката болница, додека УГД придонесува со мислења за функционалноста на училниците, амфитеатрите и академските простории.
Според плановите, Факултетот за медицински науки ќе се изгради веднаш покрај новиот објект на штипската Клиничка болница. Во близина ќе биде и нов Студентски дом, со капацитет од околу 200 легла. За овие два објекта се најавува ангажман на проектантски компании од Велика Британија, со цел да се испроектираат современи инфраструктурни решенија.
Овие проекти, ако се реализираат како што е најавено, значително ќе ги подобрат условите за студирање и за престој на студентите, особено на оние кои доаѓаат од други градови. Подобрена инфраструктура на Факултетот за медицински науки ќе значи и поблизок пристап до клинички практики, а Студентскиот дом ќе олесни сместувањето за оние што живеат далеку од кампусот.
Со почетокот на академската година, надежите се големи – студентите очекуваат дека ветувањата ќе се претворат во реалност, а Универзитетот ќе добие нови капацитети кои ќе го унапредат високото образование во регионот.
