Со едногласна одлука на Советот на Општина Струмица, објектот на Стариот суд
Беше даден на трајно користење на Струмичката православна епархија со цел да се изгради Митрополија. Со оваа одлука, Стариот суд станува Митрополија.
Градоначалникот Костадин Костадинов образложувајќи ја одлуката зад која што застанаа сите советници, рече дека со ова, струмичката епархија конечно ќе добие свој објект Митрополија.
-Ова навистина е важен момент за Струмица и важен момент за одлуките на Советот којшто верувам во духот на единството и во духот на поддршката на вистинските вредности коишто ги негува и штити Струмица, а ќе биде нескромно да не се спомне под силната закрила на Православната црква, а особено на Струмичката епархија, но мора да признаеме дека сме една од ретките Општини, една од ретките епархии коишто немаат своја Митрополија и тоа мораме да го коригираме, рече Костадинов.
Општината ги обезбеди заштитно- конзерваторските извештаи, изготвен е проект, како и пресметка и за рушење и за градење на Митрополијата. Според Костадинов за уривање на објектот потребни се 1.404.962 денари, а изградбата на Митрополијата согласно пресметките ќе чини 31.257.631 денари.
Се гордеам што, заедно со моите колеги архитекти, проектантите и стручните лица од Музејот, ги надминавме сите проблеми и препреки, кои секогаш постојат кога се работат вакви големи проекти, и успеавме да ја изработиме целокупната потребна проектно – техничка документација за конзервација и целосна реконструкција на “Стариот Суд”.
-Му благодарам на градоначалникот Kosta Kostadinov што ја препозна потребата и важноста за реализација на овој проект, и што како објект – дел од Споменичката целина “Г”, зградата на Стариот Суд, заедно со Црквата Свети Кирил и Методиј, ќе бидат обележје, белег на нашиот град, архитектура која во иднина ќе биде срце на Струмичката Епархија и на нашата Струмица, напиша Софија Ристова Партикова, архитект во општина Струмица.
Струмичката православна епархија во реализирањето на проектот и изградбата на новиот објект кој ќе биде идентичен на постоечкиот, ја очекува поддршката од општествено одговорните компании и од локалните власти.
