Напредува проектот „Струмица вело град“ – објавен повик за субвенционирање велосипеди

Изминатата недела се навршија точно шест месеци откако во Струмица интезивно се работи на изградба на велосипедски патеки на повеќе локации во градското подрачје во рамки на проектот „Струмица-паметен вело град“.

Увид во изградбата денеска изврши градоначалникот Костадинов, кој истакна дека е задоволен од интензитетот и динамиката на спроведување на активностите.

-За фактичката изведба на терен добив уверување дека реализацијата е во согласност со проектната документација и согласно сите европски стандарди, како од аспект на техничка изведба и квалитет, така и од аспект на еколошка и заштита на животната средина. Како општина континуирано поставуваме високи цели во поглед на квалитетот на живот преку следење на светските трендови, целејќи кон заштита на животната средина и примерите на најразвиените европски градови кои ја охрабруваат примената на „почист превоз“, изјави струмичкиот градоначалник.

Додаде дека претстои реализација на уште два нови проекта за љубителите на рекреативниот велосипедизам. Во Градскиот парк во Струмица ќе започне изградбата на „памп-трака“, додека за љубителите на планинскиот велосипедизам ќе започне уредување на мал вело парк на ридовите над градот.

Костадинов посочи дека Општина Струмица и оваа година продолжува со спроведување на конкретни активности за поттикнување користење велосипед како превозно средство. За таа цел на веб страницата на Општина Струмица е објавен јавен повик за субвенционирано купување на велосипеди, а во најава е поставување паркинзи за велосипеди по должината на велосипедските патеки и на други јавни места.
-Ако немате, ви нудиме можност да си купите. Средствата што Општина Струмица ќе ги субвенционира се во износ од % од вредноста на велосипедот, но не повеќе од 10.000,00 денари по лице, со вклучен персонален данок на доход.Денеска го објавивме Јавниот повик кој ќе биде отворен до исцрпувањето на буџетот, но не подоцна од 28 април и важи за сите граѓани на општина Струмица. Повеќе информации на општинската веб страница https://strumica.gov.mk/javen-povik-za-subvencioniranje… Вие купете велосипед, а ние ќе го исполниме нашето ветување за завршување на велосипедската инфраструктура во должина од 11 километри во рамките на проектот Струмица – паметен вело град, порача Костадинов.


Досега се изградени велосипедски патеки во должина од 4,5 километри од вкупно 13. Средствата за овој проект во износ од 750 илјади евра се обезбедени од ЕУ во рамки на програмата „ЕУ за општините“ и се однесува на иновативно и ефективно решение со кое ќе се стимулира употребата на велосипедот како здрав, еколошки и економичен начин на мобилност.