Градот Скопје од денеска ја расчистува големата дива депонија на влезот во село Рашче. Од ова сметиште ќе бидат подигнати над 2.000 кубни метри отпад.
Како што истакна скопскиот градоначалник целта е да се спречи повторно создавање на депонијата како и нејзино палење и загадување на амбиенталниот воздух.
„Градот Скопје изминатиов период интензивно работи на расчистување на повеќедецениски диви депонии. Ја расчистивме депонијата во Кисела Вода, во Мичурин, во Визбегово и во дел од Вардариште кои полека прераснуваат во убави паркови и во места каде што скопјани може да го поминуваат своето слободно време во здрава животна средина“, рече градоначалникот Петре Шилегов, на почетокот на акцијата за расчистување на дивата депонија во Рашче.
Акцијата за расчистување на оваа дива депонија Градот Скопје ја спроведува во соработка со Општина Сарај, јавните градски претпријатија и со механизација од локалната бизнис заедница. Тој најави дека веднаш по расчистувањето на оваа локација Градот Скопје и Општина Сарај ќе имаат засилен инспекциски надзор за да се спречи повторно создавање на депонијата и да се казнат оние што фрлаат отпад и создаваат вакви сметишта.
На денешната акција за расчистување на дивата депонија во Рашче присуствуваше и градоначалникот на Општина Сарај, Блерим Беџети, претседателката на Советот на Град Скопје, Љубица Јанчева и директорот на ЈП „Комунална хигиена“, Абдусамед Шабани.
